Guardiola á enga útgönguleið

Það skiptir ekki máli hvort Man. City verði í Meistaradeildinni eða Evrópudeildinni næsta vetur. Pep Guardiola verður samt stjóri liðsins.

Umræða fór í gang eftir leik Man. City og Man. Utd um síðustu helgi hvort Guardiola þyrfti ekki að standa við samning sinn við félagið ef það væri ekki í Meistaradeildinni.

BBC hefur síðan greint frá því að engin slík klausa sé í samningi Guardiola við City.

Guardiola er búinn að skrifa undir þriggja ára samning við félagið og kemur til Manchester næsta sumar.

City er enn í fjórða sæti deildinni sem gefur sæti í Meistaradeildinni. Guardiola hefur aðeins þjálfað lið í Meistaradeildinni hingað til og hefur enga reynslu af Evrópudeildinni.