Everton í engum vandræðum með D-deildarlið Carlisle | Sjáðu mörkin

Lærisveinar Roberto Martinez unnu öruggan 3-0 sigur á Carlisle í enska bikarnum í dag en með sigrinum bókuðu þeir sæti sitt í 16-liða úrslitum bikarsins.

Carlisle sem keppir í ensku 2. deildinni, fjórðu efstu deild ensku deildarkeppninnar komust nokkuð óvænt í 32-liða úrslit bikarsins en það var ljóst strax í upphafi leiks að leikmenn Everton ætluðu ekki að láta neitt út af bregða.

Arouna Kone kom Everton yfir á 2. mínútu leiksins þegar hann stýrði fyrirgjöf Aaron Lennon í netið og rúmlega tíu mínútum síðar bætti Lennon við öðru marki Everton eftir góðan undirbúning Brian Oviedo.

Miðjumaðurinn Ross Barkley gerði út um leikinn um miðbik seinni hálfleiks þegar hann skoraði með glæsilegu skoti við vítateigsbogann en stuttu síðar var Barkley skipt af velli til að hlífa honum við meiðslum.

Hvorugu liði tókst að bæta við marki á lokamínútum leiksins og lauk leiknum með 3-0 sigri Everton sem er því komið í 16-liða úrslit bikarsins.

Lennon bætir við öðru marki: Barkley innsiglar sigurinn með frábæru marki: