Yorke gagnrýnir Van Gaal: Það nennir enginn að horfa á fótboltann sem hann vill spila

Dwight Yorke, sem vann þrennuna með Manchester United árið 1999, hefur bæst í hóp fyrrverandi leikmanna liðsins sem hefur engan smekk fyrir leikstíl Louis van Gaal.

Spilamennska United hefur verið ansi bragðdauf að undanförnu, en liðið skoraði ekki í þremur leikjum í röð eftir að gera jafntefli í Meistaradeildinni gegn CSKA Moskvu.

Það vann svo seinni leikinn gegn CSKA, 1-0, og náði að skora tvö mörk gegn West Bromwich Albion um helgina þó spilamennska liðsins væri ekki beint skemmtileg.

Erum í skemmtanabransanum

Paul Scholes hefur verið duglegur við að gagnrýna Louis van Gaal og leikstíl hans en Hollendingurinn lætur sér fátt um finnast segir gagnrýni Scholes ekki hafa nein áhrif á sig.

„Arfleið Sir Alex eftir hans 26 ár hjá félaginu er, að við erum vanir að sjá ákveðna tegund af fótbolta spilaðann. Það er því auðvelt að skilja að menn sem spiluðu lengi fyrir United séu ósáttir og þeir mega hafa sína skoðun. Hvort Van Gaal sé sammála því er svo önnur saga,“ segir Yorke í viðtali við 888Sport.com, en Daily Mail greinir frá.

„Ég skil hvers vegna fólk er ósátt því enginn er vanur svona fótbolta og það er erfitt fyrir menn að horfa upp á þetta. United verður að taka ákveðnar áhættur. Það er gott og vel að vera með einhverja leikáætlun og reyna þreyta lið með að halda boltanum, en þessi leikur snýst um skemmtun og að taka áhættur.“

„Það vill enginn sjá svona fótbolta því á endanum erum við í skemmtanabransanum. United hefur alltaf skemmt fólki. Nú bara vonumst við eftir því að sjá það aftur. Staðreyndin er að United mun skemmta fólki aftur hvort sem það verður undir stjórn Van Gaal eða einhvers annars,“ segir Dwight Yorke.