Áhorfandi kærður fyrir að ögra Wenger

Stuðningsmenn Arsenal halda áfram að gera Arsene Wenger, stjóra Arsenal, lífið leitt.

Nú er búið að kæra hinn 25 ára gamla Luke Bryant en hann gerði sér lítið fyrir og stökk inn á völlinn í leik Arsenal og Southampton á Nýársdag og alla leið að Wenger sem sat á bekknum.

Þar lét hann Wenger heyra það áður en hann var borinn burt af öryggisvörðum.

Bryant mun þurfa að mæta fyrir rétt þann 22. janúar næstkomandi enda braut hann lög með þessari hegðun sinni.

Í síðasta mánuði lét hópur stuðningsmanna Arsenal stjórann heyra það er hann fór í lestina frá Stoke til London. Svo hafa verið skipulögð mótmæli og borðar í stúkunni gegn Wenger. Hann er ekki sá vinsælasti hjá stuðningsmönnum félagsins.