Debuchy gæti misst af öðrum þremur mánuðum

Mathieu Debuchy, hægri bakvörður Arsenal í ensku úrvalsdeildinni í fótbolta, verður lengi frá ef hann þarf að fara í aðgerð vegna axlarmeiðsla sinna.

Debuchy fór úr axlarlið í 3-0 sigurleik liðsins gegn Stoke um síðustu helgi, en Marko Arnatauvic, leikmaður Stoke, ýtti við honum þegar boltinn var úr leik.

Sjá einnig:Öruggur sigur Arsenal á Stoke | Sjáið mörkin

Frakkinn fer til sérfræðings á næstu dögum og komi í ljós að hann þurfi að fara í aðgerð verður hann frá keppni í þrjá mánuði, að því fram kemur í breskum miðlum í dag.

Þetta yrði í annað sinn á leiktíðinni sem Debuchy spilar ekki fótbolta í þrjá mánuði, en hann meiddist á ökkla fyrr á leiktíðinni og var frá þetta lengi. Hann kom til baka eftir ökklameiðslin í desember.

Þetta er mikið áfall fyrir Arsenal-liðið sem hefur glímt við mikil meiðslavandræði á varnarmönnum á leiktíðinni.