Monk heldur starfinu í bili

Stjórn Swansea mun hafa fundað um helgina til að ræða stöðu knattspyrnustjórans Garry Monk hjá Swansea en undir hans stjórn hefur liðið aðeins unnið einn leik af síðustu níu.

Swansea gerði um helgina 2-2 jafntefli við Bournemouth en fyrir leikinn gerði Monk róttækar breytingar á liði sínu og setti meðal annars Gylfa Þór Sigurðsson á bekkinn. Gylfi kom inn á sem varamaður á 70. mínútu.

Sjá einnig: Monk: Næst gef ég Gylfa köku

BBC greindi frá fundarhöldum stjórnarinnar í gærkvöldi en Sky Sports fullyrti á vef sínum í morgun að starf Monk væri öruggt - í bili.

Swansea er í fjórtánda sæti deildairnnar með fjórtán stig eftir þrettán leiki. Liðið á hins vegar erfiða leiki fram undan og mætir til að mynda Liverpool, Leicester, Manchester City og West Ham.

Sjá einnig: Swansea náði aðeins í stig gegn Bournemouth

Monk hefur áður sakað utanaðkomandi aðila um reyna að koma sér frá Swansea með óvæginni gagnrýni í fjölmiðlum en eftir leikinn sagði fyrirliði Swansea, Ashley Williams, að Monk nyti stuðnings leikmanna liðsins.