Gylfi Þór gæti fengið nýjan stjóra

Garry Monk, knattspyrnustjóri Swansea, gæti fengið uppsagnarbréf frá félaginu í dag, en enska götublaðið Daily Mirror heldur því fram að dagar Englendingsins séu taldir.

Monk stóð sig frábærlega á sinni fyrstu heilu leiktíð sem stjóri Swansea á síðasta tímabili og náði besta árangri liðsins í sögu þess, en annað er uppi á teningnum núna.

Sjá einnig:Guðjón þjálfaði stjóra Gylfa Þórs: Hefur burði til að komast í fremstu röð

Eftir að fara taplaust í gegnum fyrstu fimm leiki tímabilsins er Swansea nú aðeins búið að vinna einn leik af síðustu átta í úrvalsdeildinni og það gegn botnliði Aston Villa. Verði Monk látinn fara var síðasti naglinn í kistuna 1-0 tap gegn nýliðum Norwich á laugardaginn.

Vilja fá reyndari stjóra

Gylfi Þór Sigurðsson og félagar voru einnig slegnir úr leik í deildabikarnum af Hull og hafa ekki safnað nema fimm stigum af 24 mögulegum í síðustu átta úrvalsdeildarleikjum.

Ensku götublöðin halda því fram að Huw Jenkins, stjórnarformaður Swansea, sé búinn að fá nóg og ætli sér að finna reyndari mann til að snúa við gengi Swansea.

Áður hefur verið fjallað um að stjórn Swansea vildi fá reyndan mann inn í þjálfarateymið hjá Monk sem er í sínu fyrsta stjórastarfi eftir að leggja skóna á hilluna sem leikmaður fyrir rúmu ári síðan.

Sagt er að Monk hafnaði þeirri beiðni frjá stjórninni, en sjálfur sagði hann ekkert til í þessum sögum þegar gegið var á hann fyrr á tímabilinu.

Gylfi Þór Sigurðsson hefur ávallt talað vel um Monk sem hefur miklar mætur á íslenska landsliðsmanninum og hefur hann í byrjunarliðinu í hverjum einasta leik.