QPR vill fá Hasselbaink

QPR er enn í stjóraleit og nú er félagið farið í viðræður við Jimmy Floyd Hasselbaink, fyrrum framherja Chelsea.

Chris Ramsey var rekinn frá félaginu og Neil Warnock hefur leyst stjórastöðuna tímabundið síðan þá. Ramsey féll með liðið úr úrvalsdeildinni í fyrra og liðið byrjaði svo ekki vel í B-deildinni.

QPR hefur rætt við tólf stjóra um starfið og eftir þau viðtöl er Hasselbaink efstur á blaði hjá félaginu.

Hinn hollenski Hasselbaink hóf þjálfaraferil sinn hjá Royal Antwerp og tók síðan við Burton á Englandi. Hann vann D-deildina með liðinu á síðustu leiktíð.

Liðið hefur síðan verið á siglingu í C-deildinni í vetur og er aðeins tveim stigum frá toppsætinu.