Neville: Martial verður einn sá besti í heimi

Phil Neville, fyrrverandi leikmaður Manchester United, telur að Anthony Martial, framherji liðsins, verði einn sá besti áður en fram líða stundir.

Frakkinn ungi, sem er aðeins 19 ára gamall, kostaði United 36 milljónir punda til að byrja með og sú upphæð getur hækkað verulega vegna árangurstengdra greiðslna. Neville segir þetta þó vera tombóluverð í ljósi gæða stráksins.

„Það sem hann kemur með fyrst og fremst inn í United-liðið er hraði og hraði í skyndisóknum eins og við sáum gegn Everton. Hann kemur líka með hraða inn í þetta þegar liðið er að senda boltann á milli sín eins og Louis van Gaal vill gera,“ segir Neville um strákinn á heimasíðu Manchester United.

„Hann er sterkur og snöggur. Fólk efast um upphæðina sem hann var keyptur á en ég held að United hafi gert kjarakaup. Martial er gerður fyrir ensku úrvalsdeildina.“

Martial kom inn með miklum látum. Hann skoraði í fyrsta leik gegn Liverpool og setti mark í fyrstu fjórum leikjum sínum en hefur nú aðeins skorað eitt í síðustu níu og ekki tekist að skora í síðustu sex leikjum.

„Það er meira á leiðinni,“ segir Neville sem hefur tröllatrú á Martial og telur að hann eigi eftir að fara alla leið á toppinn.

„Hann er enn þá ungur. Hann er að læra og við munum sjá meira frá þessum framherji. Hann verður, að ég tel, einn besti leikmaður heims,“ segir Phil Neville.