Leikmaður Chelsea: Myndi frekar tapa en að vinna fyrir Mourinho

„Ég myndi frekar tapa en að vinna fyrir Jose Mourinho.“ Þetta hefur þáttastjórnandinn Garry Richardson á BBC eftir ónefndum leikmanni í aðalliði Chelsea.

Englandsmeistararnir hafa byrjað tímabilið hörmulega en þeir töpuðu 1-3 fyrir Liverpool á heimavelli í gær. Chelsea hefur tapað sex af fyrstu 11 leikjum sínum í úrvalsdeildinni en Mourinho situr í heitu sæti þessa dagana.

Sjá einnig: Mourinho: Ég hef ekkert að segja

Samkvæmt heimildum Richardson er samband Mourinho við leikmenn liðsins stirt, og þá sérstaklega Eden Hazard en Belginn hefur ekki fundið taktinn í vetur og var tekinn af velli á 59. mínútu gegn Liverpool.

Að sögn Richardson eru leikmenn Chelsea orðnir þreyttir á Mourinho og framkomu hans en Portúgalinn verður seint sakaður um að vera átakafælinn maður.

Sjá einnig: Costa gæti verið á leið í fjögurra leikja bann

Chelsea tekur á móti Dynamo Kiev í Meistaradeild Evrópu á miðvikudaginn en ljóst er að Mourinho þarf sigur til að lægja öldurnar í kringum sig og félagið.