Louis van Gaal ekki viss með Martial

Anthony Martial hefur heillað marga stuðningsmenn Manchester United upp úr skónum en hefur hann verið að spila í réttri stöðu að undanförnu.

Louis van Gaal, knattspyrnustjóri Manchester United, viðurkennir að hann sé enn að leita að bestu leiðinni til að nýta krafta Anthony Martial sem best.

Anthony Martial er 19 ára franskur landsliðsmaður sem var keyptur frá AS Monakó á 35 milljónir punda á lokadegi síðasta félagsskiptaglugga.

Martial byrjaði vel hjá Manchester United og er þegar búinn að skora fimm mörk fyrir félagið í tíu leikjum í öllum keppnum þar af 3 mörk í 6 leikjum í ensku úrvalsdeildinni.

Manchester United hefur ekki skorað í síðustu þremur leikjum sínum og stuðningsmenn félagsins hafa ekki verið sáttir við að sjá Anthony Martial spilað út á vinstri kanti. Strákurinn hefur sýnt skemmtileg tilþrif og þá ekki síst sem framherji.

„Hann spilaði alltaf sem vinstri vængmaður hjá Mónakó og ég þarf að reyna að finna út besta jafnvægið hjá liðinu," útskýrði Louis van Gaal.

Anthony Martial hefur bara skorað eitt mark síðan í septembermánuði og það kom á móti CSKA Moskvu í Meistaradeildinni.

„Við höfum notað hann í framherjastöðunni en hann var meira eða minna út á vinstri kanti hjá franska liðinu," sagði Louis van Gaal við BBC en viðurkennir um leið að hann sé ekki viss um hver sé besta staða Anthony Martial þegar hann klæðist Manchester United búningnum.

Tölfræðin talar þó sínu máli og Anthony Martial er búinn að skora tvö mörk sem framherji og eitt mark sem hægri kantmaður í ensku úrvalsdeildinni á leiktíðinni.

Anthony Martial hefur aftur á móti spilað sem vinstri vængmaður í síðustu þremur deildarleikjum án þess að ná að skora á þeim 270 mínútum.

Wayne Rooney er að spila fremstur þessa dagana og Spánverjinn Juan Mata er úti hægra megin.