Mourinho 18 milljónum krónum fátækari eftir mánuðinn

Jose Mourinho mun að öllum líkindum ekki stýra liði sínu, Chelsea, þegar það mætir Stoke í ensku úrvalsdeildinni á laugardag.

Það varð ljóst eftir að enska knattspyrnusambandið dæmdi hann í eins leiks bann fyrir framkomu sína í leik Chelsea og West Ham þann 24. október.

Mourinho var þá rekinn upp í stúku eftir að hann fór á fund dómara leiksins í hálfleik. Jon Moss, dómari leiksins, mun hafa gefið honum reisupassann eftir að Mourinho neitaði að yfirgefa búningsklefa dómaranna í hálfleik.

Mourinho gæti þó staðið á hliðarlínunni á laugardag ef hann ákveður að áfrýja banninu.

Sjá einnig: Mourinho fékk bæði leikbann og sekt

Hann var enn fremur sektaður um 40 þúsund pund vegna málsins en fyrir tæpum mánuði síðan var hann sektaður um 50 þúsund pund fyrir ummæli sín eftir að Chelsea tapaði fyrir Southampton.

Það þýðir að Mourinho er nú tæpum átján milljónum krónum fátækari eftir mánuðinn en líklegt er að hann hafi litlar áhyggjur af því þessa stundina. Mourinho hefur ekki átt sjö dagana sæla á Stamford Bridge en Englandsmeistarar Chelsea eru í fimmtánda sæti deildarinnar með aðeins ellefu stig eftir jafn marga leiki.

Sjá einnig: Eva hjólar í Mourinho

Chelsea mætir Dynamo Kiev í Meistaradeild Evrópu annað kvöld en fullyrt hefur verið að Mourinho gæti misst starfið sitt ef vikan fer illa fyrir Mourinho og lærisveina hans hjá Chelsea.

Hér fyrir neðan má sjá samantekt Sky Sports á þeim sektum sem Mourinho hefur sankað að sér síðan hann tók við Chelsea öðru sinni árið 2013.

Sjá einnig: Mikel segir að leikmenn styðji Mourinho

Jose Mourinho has been fined £90,000 in the last month #SSNHQ pic.twitter.com/9olPup2k2C

— Sky Sports News HQ (@SkySportsNewsHQ) November 3, 2015