Frakki bannar leikmönnum að tala frönsku

Hinn nýi, franski stjóri Aston Villa. Remi Garde, hefur bannað mönnum að tala frönsku í búningsklefa félagsins.

Það komu fjórir leikmenn frá Frakklandi til Villa síðasta sumar og þeir þurfa að gjöra svo vel og tala ensku í klefanum. Alls tala átta leikmenn liðsins tungumálið.

„Þeir þurfa að vera fljótir að læra ensku. Ég vil ekki heyra neina frönsku í klefanum," sagði Garde sem sjálfur talar ágætis ensku eftir að hafa spilað með Arsenal á sínum tíma.

„Það er mjög mikilvægt að við skiljum allir hvorn annan. Svo þurfa ensku strákarnir stundum að tala hægt. Það þurfa allir að leggja sig fram."

Villa hefur aðeins unnið einn leik í vetur og situr á botni ensku úrvalsdeildarinnar.