Klopp útilokar að Gerrard spili með Liverpool

Jürgen Klopp, knattspyrnustjóri Liverpool, er ekki tilbúinn að leyfa Steven Gerrard að spila með liðinu á þessu tímabili en mikið hefur verið skrifað um mögulega endurkomu Steven Gerrard í enskum fjölmiðlum í dag.

Steven Gerrard og Jürgen Klopp hafa rætt saman síðan að Klopp tók við liði Liverpool af Brendan Rodgers.

Gerrard hefur verið orðaður við mögulega þjálfarastöðu á Anfield og sumir sáu hann fyrir sig fara á láni til síns gamla félags á meðan hlé er á tímabilinu í Bandaríkjunum.  Þýski knattspyrnustjórinn þarf ekki á þjónustu Stevie G að halda.

„Það eina sem ég get sagt er að ég hef verið í sambandi við Stevie. Þetta var eitt símtal og nokkur smáskilaboð," sagði Jürgen Klopp aðspurður um stöðu mála en viðtalið við Klopp var í Guardian.

„Gerrard er goðssögn. Ef hann er í Liverpool og vill æfa til að undirbúa sig fyrir næsta tímabil hjá Los Angeles Galaxy þá er það ekkert mál. Það verður samt aldrei meira en það," sagði Klopp.

Steven Gerrard spilaði sinn síðasta leik með Liverpool síðasta vor en hann var hjá félaginu frá 1998 til 2015.