Gerrard gæti spilað með Liverpool

Steven Gerrard hefur rætt nokkrum sinnum við nýráðinn stjóra Liverpool, Jürgen Klopp, og líkur eru taldar vera á því að hann snúi aftur til félagsins.

Tímabilið hjá Gerrard í Bandaríkjunum er nýbúið og það er engin nýlunda að leikmenn úr MLS-deildinni fari annað og snúi svo aftur til síns félags.

Í frétt Independent er sagt að Klopp trúi því að nærvera Gerrard muni hjálpa til við að halda ákveðinni fagmennsku hjá félaginu.

Hér er ekki bara verið að tala um að Gerrard verði hluti af þjálfarateymi Liverpool eða álíka. Það er sagður vera möguleiki á því að hann spili fyrir félagið. Gerrard mun lenda á Englandi í dag.

Gerrard á að snúa aftur til LA Galaxy þann 15. janúar og félagið er ekki sagt vera spennt fyrir að gera álíka samning og David Beckham fékk er hann fór tvisvar til AC Milan og skilaði sér svo seint til baka.