Klopp: Var einmana þegar ég sá stuðningsmennina yfirgefa völlinn

Jürgen Klopp þurfti í gær að sætta sig við sitt fyrsta tap sem knattspyrnustjóri Liverpool og það á heimavelli þegar Crystal Palace kom í heimsókn.

Miðvörðurinn Scott Dann tryggði gestunum frá Lundúnum sigurinn, 2-1, með skallamarki á 82. mínútu. Klopp gerði jafntefli í fyrstu þremur leikjum sínum og vann svo þrjá í röð áður en kom að tapinu í gær.

Þegar Scott Dann skallaði boltann í netið fyrir Palace átta mínútum fyrir leikslok gafst hluti stuðningsmanna Liverpool upp og yfirgaf Anfield.

„Áttatíu og tvær mínútur - leik lokið,“ sagði Klopp við BBC eftir leikinn. „Ég sneri mér við og varð ansi einmana á þeirri stundu. Það erum við sem verðum að ákveða hvenær leiknum er lokið.“

Markið sem sendið fólkið heim:

Þetta er ekki í fyrsta sinn sem Liverpool fær á sig mark undir lok leiks undir stjórn Klopps á Anfield. Southampton skoraði einnig og tryggði sér jafntefli undir lokin í leik liðanna í síðasta mánuði.

Klopp er ekki reiður út í stuðningsmennina sem yfirgáfu völlinn heldur er hann ósáttur með að leikmennirnir fá ekki fólkið til að trúa að endurkoma sé handan við hornið.

„Stuðningsmennirnir hafa sínar ástæður þannig ég er ekki svekktur út í þá. Það erum við sem berum ábyrgð á því að enginn fer af vellinum fyrr en búið er að flauta til leiksloka því allt getur gerst,“ sagði Klopp.

„Það er hægt að skora átta mörk frá 82. mínútu og þar til á þeirri 94 ef menn vilja. Það verður bara að vinna fyrir því. Það þurfum við að sýna en gerðum ekki,“ sagði Jürgen Klopp.