Vardy getur bætt met Nistelrooy á Old Trafford

Jamie Vardy, framherji Leicester, hélt áfram að skora um helgina, en hann tryggði Refunum sigur gegn nýliðum Watford, 2-1, með marki úr vítaspyrnu.

Þessi 28 ára gamli framherji, sem spilaði með Fleetwood í utandeildinni fyrir þremur árum, er markahæstur í ensku úrvalsdeildinni með tólf mörk í tólf leikjum.

Leikurinn um helgina var sá níundi í röð í ensku úrvalsdeildinni sem Vardy skorar í og þarf hann nú bara að skora í næsta leik til að jafna met hollenska markahróksins Ruud van Nistelrooy.

Nistelrooy skoraði mest í tíu leikjum í röð frá mars 2003 til ágúst sama ár fyrir Manchester United, en Vardy fær tækifæri til að jafna metið gegn Newcastle á útivelli eftir landsleikafríið.

Skori Vardy þar getur hann svo bætt met United-goðsagnarinnar á móti Manchester United og það á Old Trafford þegar liðin mætast í 14. umferð deildarinnar.

Vardy er nú þegar búinn að gera betur en Nistelrooy því hann er fyrsti maðurinn sem skorar í níu leikjum í röð á einu og sama tímabilinu. Nistelrooy skoraði mest í átta leikjum í röð á sömu leiktíðinni.

Frammistaða Vardy hefur eðlilega skilað honum landsliðssæti og er hann í hópnum hjá Englandi sem mætir Spáni og Frakklandi í vináttuleikjum 13. og 17. nóvember.

Til að endurtaka þá var hann í utandeildinni fyrir þremur árum síðan.