Spilaði í utandeildinni fyrir fjórum árum en nú hafa bara örfá lið efni á honum

Claudio Ranieri, knattspyrnustjóri Leicester, hefur ekki miklar áhyggur af samningamálum markahróksins Jamie Vardy en viðurkennir að samningur hans verður líklega endurskoðaður næsta sumar.

Vardy er markahæsti leikmaður ensku úrvalsdeildarinnar með tíu mörk, en hann er búinn að skora í sjö úrvalsdeildarleikjum í röð.

Þessi velgengni hans hefur vakið áhuga Rafael Benítez hjá Real Madrid, að sögn spænskra blaða, en Benítez er sagður sjá Vardy sem fína samkeppni við Karim Benzema.

Vardy skrifaði undir nýjan fjögurra ára samning við Leicester í sumar þannig Refirnir eru í fínum málum, en ljóst er að hlutabréfin í Vardy hafa hækkað töluvert vegna markanna sem hann er að skora núna.

„Hann er ánægður hjá okkur og ánægður með samninginn sinn sem er mikilvægt. Kannski skoðum við þetta eftir tímabilið þegar hann verður búinn að skora fullt af mörkum,“ segir Ranieri.

„Það eru ekki mörg lið sem geta keypt Vardy núna. Hann er mjög ánægður hjá okkur og við viljum ekki selja hann,“ segir Claudio Ranieri.

Það er ekki slæmt fyrir leikmann sem spilaði með Fleetwood Town í utandeildinni fyrir þremur árum að vera nú of dýr fyrir flest lið.

Vardy verður hvíldur í deildarbikarnum í vikunni en heldur væntanlega áfram að skora í úrvalsdeildinni um næstu helgi.