Sheffield Wednesday fyrsta liðið til að skora þrisvar hjá Cech

Enska b-deildarliðið Sheffield Wednesday sló í gær úrvalsdeildarlið Arsenal út úr sextán liða úrslitum enska deildabikarsins eftir 3-0 sigur í leik liðanna á Hillsborough-leikvanginum.

Tékkneski markvörðurinn Petr Cech stóð í markinu hjá Arsenal í leiknum og þetta var í fyrsta sinn sem hann fékk meira en tvö mörk á sig síðan að hann kom til liðsins frá Chelsea.

Petr Cech var fyrir leikinn búinn að spila tólf keppnisleiki með Arsenal og hann hafði haldið hreinu í sjö þeirra.

West Ham, Chelsea og Leicester höfðu öll náð að skora tvisvar hjá Tékkanum en það voru leikmenn Sheffield Wednesday sem voru fyrsti til að senda boltann þrisvar framhjá Cech.

Petr Cech hefði að öllu eðlilegu fengið frí í leiknum í gær en hann spilaði þar sem að kólumbíski markvörðurinn David Ospina er meiddur á öxl. Varamarkörður í gær var hinn 21 árs gamli Matt Macey. Macey hefur aldrei spilað keppnisleik fyrir aðallið Arsenal.

Sheffield Wednesday skoraði mörkin sín frá 27. til 51. mínútu en það er hægt að sjá þau í myndbandinu hér fyrir neðan.

Petr Cech var ríkjandi meistari í enska deildabikarnum en hann stóð í marki Chelsea í 2-0 sigri á Tottenham í úrslitaleiknum í mars síðastliðnum.

Cech fékk bara einu sinni á sig meira en tvö mörk á síðasta tímabili en það var í bikartapi á móti Bradford City þar sem Chelsea tapaði 4-2.

Ross Wallace kom Sheffield Wednesday yfir á 28. mínútu: Lucsa Joao skoraði annað mark Sheffield Wednesday á 40. mínútu: Sam Hutchinson skoraði þriðja mark Sheffield Wednesday á 52. mínútu: