Sigga Jóns slagurinn í kvöld

Sheffield Wednesday spilar einn stærsta leik tímabilsins í kvöld þegar liðið tekur á móti Arsenal í sextán liða úrslitum enska deildabikarsins.

Sheffield Wednesday er í 9. sæti í b-deildinni en aðeins lakari markatala heldur Arsenal frá toppsætinu í ensku úrvalsdeildinni.

Sheffield Wednesday sló út úrvalsdeildarlið Newcastle United í síðustu umferð en verkefnið er öllu erfiðara á Hillsborough-leikvanginum í kvöld.

Sumir hafa farið svo langt að kalla þetta „Sigga Jóns derby-leikinn" en einn af bestu knattspyrnumönnum Íslands frá upphafi, Sigurður Jónsson, lék með báðum liðunum á níunda áratugnum.

Sigurður Jónsson sló í gegn hjá ÍA og fékk ungur tækifæri í meistaraflokksliði félagsins. Hann var með liðinu 1982, 1983 og 1984 en þau sumur unnu Skagamenn fimm af sex stórum titlum í boði. Sigurður samdi síðan við Sheffield Wednesday í febrúar 1985.

Sigurður var í fjögur ár hjá Sheffield Wednesday fyrir utan að hafa farið á láni í stuttan tíma til Barnsley árið 1986. Sigurður lék alls 67 leiki með Sheffield Wednesday í efstu deild á Englandi þar af 28 leiki tímabilið 1988 til 1989.

Arsenal keypti Sigurð frá Sheffield Wednesday á 475 þúsund pund í júlí 1989 og þar var hann í tvö tímabil. Sigurður var afar óheppinn með meiðsli hjá Arsenel og lék aðeins 8 leiki með liðinu. Tveir af þeim voru á meistaraárinu 1990 til 1991 sem dugðu þó ekki til að hann fengi verðlaunapening en Arsenal varð enskur meistari vorið 1991.

Sheffield Wednesday saknaði augljóslega Sigurðar en liðið féll úr efstu deild fyrsta tímabilið eftir að hann fór suður til London til að spila með Arsenal.

Sheffield Wednesday hefur ekki spilað í ensku úrvalsdeildinni síðan vorið 2000 og fór alla leið niður í C-deild frá 2010 til 2012. Liðið endaði í 13. Sæti í ensku b-deildinni á síðustu leiktíð og var þá að hækka sig í töflunni fimmta tímabilið í röð.

Leikurinn á móti Arsenal verður því einn stærsti leikur liðsins í langan tíma og margir stuðningsmenn félagsins frá þá langþráð tækifæri til að sjá sína menn spila á móti einu allra besta liði á Englands.

Sheffield Wednesday hefur ekki unnið Arsenal síðan í september 1998 en liðið hefur heldur ekki tapað leik síðan að liðið lá á móti Burnley 12. september síðastliðnum.

Leikur Sheffield Wednesday og Arsenal hefst klukkan 19.45 og verður í beinni útsendingu á Stöð 2 Sport og Stöð 2 Sport 2.