Klopp um fyrsta sigurinn: Betra en jafntefli

Jürgen Klopp var vitanlega ánægður með sinn fyrsta sigur eftir að hann tók við starfi knattspyrnustjóra hjá Liverpool en hans menn höfðu betur, 1-0, á Bournemouth í ensku deildabikarkeppninni í kvöld.

„Þetta er betra en jafntefli,“ sagði Klopp í léttum tón en Liverpool gerði jafntefli í fyrstu tveimur leikjum sínum undir stjórn Klopp.

„Ég er virkilega ánægður því þessir leikmenn sem spiluðu í kvöld höfðu aldrei gert það áður. Ungu leikmennirnir stóðu sig virkilega vel. Við sköpuðum mörg færi gegn liði sem var með nánast sitt besta lið í kvöld.“

„Við stjórnuðum leiknum og áttum skilið að vinna. Það er virkilega góð tilfinning fyrir liðið allt.“