Mourinho verður á hliðarlínunni gegn Liverpool

Þó svo búið sé að kæra Jose Mourinho, stjóra Chelsea, fyrir hegðun sína um síðustu helgi þá mun hann stýra liði Chelsea um helgina gegn Liverpool.

Mourinho var rekinn af velli í leik Chelsea um síðustu helgi gegn West Ham. Hann er sagður hafa hellt sér yfir Jon Moss dómara í hálfleik og hefur verið kærður fyrir það.

Hann þarf að svara kærunni í dag og sama hvort hann lýsir sig sekan eða saklausan ætti hann að geta stýrt Chelsea.

Ef hann lýsir sig saklausan verður málið tekið fyrir í næstu viku. Ef hann játar brot sitt verður það einnig tekið fyrir og líklega ekki fyrr en eftir næstu helgi. Hann nær því leiknum gegn Liverpool.

Það gæti reyndar orðið í síðasta skiptið sem við sjáum Mourinho á hliðarlínunni með Chelsea enda sjóðheitt undir honum og tap um helgina gæti orðið hans banabiti.