Alex Ferguson: Var bara með fjóra heimsklassa leikmenn í United-liðunum mínum

Sir Alex Ferguson var knattspyrnustjóri Manchester United í 26 ár og United vann þrettán sinnum enska meistaratitilinn undir hans stjórn. Skotinn segist þó aðeins hafa verið með fjóra heimsklassa leikmenn í United-liðunum sínum.

Sir Alex Ferguson er að gefa út nýja bók sem heitir "Leading" og enskir fjölmiðlar hafa verið duglegir að birta brot úr bókinni. Daily Mail vakti athygli á orðum Sir Alex um heimsklassa leikmenn.

Að mati Ferguson var Cristiano Ronaldo besti leikmaðurinn sem spilaði fyrir hann hjá Manchester United en Skotinn er einnig á því að þeir Eric Cantona, Ryan Giggs og Paul Scholes hafi verið heimsklassa leikmenn.

„Þegar fólk les blöðin eða hlustar á fótboltasérfræðinganna í sjónvarpinu þá er endalaust verið að tala um heimsklassa fótboltamenn," sagði Sir Alex Ferguson í bókinni sinni.

„Í minni bók eru aðeins tveir heimsklassaleikmenn að spila í dag og það eru þeir Lionel Messi og Cristiano Ronaldo," skrifaði Ferguson ennfremur.

„Ég vil alls ekki gera lítið úr þeim frábæru eða mjög góðu fótboltamönnum sem spiluðu fyrir mig á þessum 26 árum hjá Manchester United en það voru bara fjórir sem gátu talist vera heimsklassa eða þeir Cantona, Giggs, Ronaldo og Scholes," skrifaði Ferguson.

„Af þessum fjórum þá var Cristiano eins og stjarnan á toppi jólatrésins," skrifaði Ferguson en hann keypti Cristiano Ronaldo frá Sporting Lisbon fyrir 12,24 milljónir punda árið 2003 þegar Portúgalinn var enn bara táningur. Sex árum síðar seldi hann Ronaldo til Real Madrid fyrir 80 milljónir punda.