Ferguson ræddi við Guardiola um að taka við Manchester United

Sir Alex Ferguson, fyrrum knattspyrnustjóri Manchester United, greinir frá því í nýrri bók sem hann er að skrifa, að hann hafi meðal annars rætt við Pep Guardiola árið 2012 um að taka við starfi sínu en ári síðar tók David Moyes við keflinu af Ferguson.

Á þeim tíma var Guardiola í árs leyfi eftir að hafa stýrt liði Barcelona í fjögur ár en ári síðar ákvað hann að taka við af Jupp Heynckes hjá Bayern Munchen þar sem hann hefur stýrt liðinu til sigurs í þýsku deildinni fyrstu tvö ár sín hjá félaginu.

Í stað Guardiola tók hinn skoski Moyes við starfinu en honum var sagt upp störfum strax á fyrsta tímabili er Manchester United missti af sæti í Meistaradeildinni.

Greindi Ferguson frá því að hann hefði rætt við Guardiola, Jurgen Klopp, Carlo Ancelotti, Jose Mourinho og núverandi stjóra liðsins, Louis Van Gaal, um að taka við félaginu.

„Ég fór út að borða með Guardiola árið 2012 en ég gat ekki boðið honum starfið á þeim tíma þar sem ég var ekki búinn að ákveða neitt með framtíð mína. Ég hafði mikið álit á honum og ég bað hann um að láta mig vita ef hann ætlaði að taka við öðru starfi en hann gerði það ekki og tók við Bayern ári síðar.“