Ferguson: Mistök hjá Moyes að reka Phelan

David Moyes hefði ekki átt að reka Mike Phelan úr starfi aðstoðarþjálfara þegar hann tók við Manchester United sumarið 2013. Þetta segir Sir Alex Ferguson í nýrri bók sinni, Leading, sem kemur út á morgun.

Moyes tók við United þegar Ferguson steig til hliðar en eitt af hans fyrstu verkum var að skipta algjörlega um þjálfarateymi hjá félaginu. Það þýddi að Phelan, meðal annarra, missti vinnuna en hann var aðstoðarþjálfari Ferguson síðustu ár hans með United.

„Moyes hefði eflaust gert margt öðruvísi ef hann fengi tækifæri til,“ segir Ferguson í bók sinni.

„Eins og að halda Phelan sem hefði getað hjálpað honum og miðlað af reynslu sinni af félaginu eins og Ryan Giggs er að gera fyrir Louis van Gaal í dag.

„Það er engin ástæða til að breyta út af vana sem leikmenn eru ánægðir með. Það hefur þveröfug áhrif, hefur slæm áhrif á móralinn innan liðsins og fær leikmenn til að efast um nýja manninn og hans áætlanir. Leiðtogi sem kemur inn í nýjar aðstæður þarf að hemja sig þegar kemur að því að sýna manndóm sinn.“

Moyes entist aðeins 34 deildarleiki í starfi hjá United áður en hann var rekinn og Giggs tók tímabundið við liðinu. Í bók Ferguson kemur einnig fram að Moyes hafi verið langt frá því að vera hans fyrsti kostur til að taka við liðinu sem hann stýrði í 26 ár.