Hætta loftárásum á Húta í Jemen

Sádi-Arabar og bandamenn þeirra hafa hætt loftárásum á uppreisnarmenn í Jemen. Yfirvöld segja að „hernaðarlegum markmiðum“ árásanna hafi verið náð.

Að því er BBC greinir frá mun bandalagið nú standa fyrir aðgerðum til að koma á stjórnmálalegri sátt í Jemen. Loftárásir gegn Hútum, uppreisnarmönnum úr röðum Sjía-múslima, stóðu alls yfir í mánuð en báru takmarkaðan árangur.

Stjórnvöld í Íran hafa fagnað ákvörðuninni um að hætta loftárásum og segja það skref í rétta átt. Sádi-Arabar hafa ítrekað ásakað Írani um að styðja Hútana með vopnagjöfum, en því neita Íranir.

Ringulreið hefur ríkt í Jemen allt frá því að Hútar lögðu undir sig höfuðborgina Sanaa í janúar síðastliðnum og settu forseta landsins, Abdrabbú Mansúr Hadí, í stofufangelsi. Hadí slapp í febrúar og flúði land í lok mars.