Loftárásar gerðar gegn Hútíum

Sádí arabar hófu í nótt hernaðaraðgerðir, þar á meðal loftárásir, á sveitir Hútí uppreisnarmanna í Jemen. Þetta tilkynnti sendiherra Sádí araba í Bandaríkjunum. Sendiherrann segir að land sitt hafi brugðist við tli þess að verja hina lögmætu ríkisstjórn Mansours Hadí í Jemen, en Hútí uppreisnarmennirnir hafa náð valdi á stórum hluta landsins og þar með talið höfuðborginni Sanaa.

Óttast er að átökin muni hafa víðtækari afleiðingar en uppreisnarmennirnir eru studdir dyggilega af Írönum, einum höfuðandstæðingi Sáda á svæðinu. Heimildarmenn AFP fréttastofunnar í Sanaa segja að minnsta kosti þrettán óbreyttir borgarar hafi fallið í árásum næturinnar sem meðal annars beindust að flugvelli borgarinnar.

Talskona Hvíta hússinns sagði í nótt að Obama bandaríkjaforseti hefði gefið leyfi fyrir því að bandaríkjaher veitti aðstoð við aðgerðirnar en hún tók skýrt fram að herinn ætti ekki beina aðild að þeim.