Kúba tekið af lista Bandaríkjanna yfir ríki sem styðja hryðjuverk

Bjarki Ármannsson skrifar 14. apríl 2015 19:55

Barack Obama Bandaríkjaforseti hyggst taka Kúbu af lista Bandaríkjanna yfir þau ríki sem styðja hryðjuverk. Í tilkynningu til þingsins segir Obama að ríkisstjórn Kúbu hafi ekki stutt alþjóðleg hryðjuverk síðasta hálfa árið og að stjórnin ábyrgist að hún muni ekki gera það í framtíðinni.

Um er að ræða stórt skref í átt að betra stjórnmálasambandi þjóðanna, en það hefur andað köldu á milli þeirra frá því að kommúnistar komust til valda í Kúbu árið 1959. Obama og Raul Castro, forseti Kúbu, hittust á sögulegum fundi í Panama í síðustu viku sem var fyrsti fundur leiðtoga ríkjanna tveggja í fimmtíu ár.

Kúba hefur verið á listanum frá árinu 1982 vegna gruns Bandaríkjastjórnar um að ríkisstjórn Kúbu hefði veitt liðsmönnum basknesku aðskilnaðarhreyfingarinnar ETA á Spáni skjól. Íran, Súdan og Sýrland eru áfram á listanum, að því er BBC greinir frá.

Josh Earnest, fjölmiðlafulltrúi Hvíta hússins, segir að Bandaríkin og Kúbu greini þó áfram á um ýmis mikilvæg atriði. Kúba mun áfram sæta viðskiptabanni, að minnsta kosti enn um sinn.

Tengdar fréttir

Vill fjarlægja Kúbu af lista yfir ríki sem styðja hryðjuverkastarfsemi

Síðustu mánuði hefur verið unnið að auknum og bættum samskiptum milli Bandaríkjanna og Kúbu.

7. apríl 2015 20:40

Kollegar frá Kúbu og Bandaríkjunum hittust í Panama

Utanríkisráðherrar Bandaríkjanna og Kúbu, þeir John Kerry og Bruno Rodriguez hittust í gærkvöldi á fundi en svo háttsettir embættismenn hvorrar þjóðar fyrir sig hafa ekki hist í rúma hálfa öld. Kollegarnir voru saman í Panama til að sitja fund Ameríkuríkja sem hefst í dag og var ákveðið að þeir myndu hittast enda hefur þíðan á milli ríkjanna tveggja ekki verið meiri frá því Fidel Castro og félagar hans gerðu byltingu á Kúbu á sínum tíma.

10. apríl 2015 08:50