Vieira orðaður við starfið hjá Manchester City

Patrick Vieira, fyrrverandi leikmaður Arsenal, gæti tekið við liði Manchester City í ensku úrvalsdeildinni í sumar losi það sig við Manuel Pellegrini.

Breska blaðið The Times greinir frá þessu í morgun, en talið er að Pellegrini eigi ekki mikið eftir á Etihad-vellinum þar sem allt stefnir í titlalaust tímabil hjá City-liðinu.

Vieira þjálfar U21 árs lið Manchester City í dag auk þess að vera þróunarstjóri félagsins og huga að uppgangi yngri leikmanna félagsins.

Hann er mikils metin innan City, en hann kláraði feril sinn í ensku úrvalsdeildinni með Manchester City tímabilið 2010-2011.

Fleiri öflugir menn eru orðaðir við starfið, nú sérstaklega Jürgen Klopp, þjálfari Dortmund, eftir að hann tilkynnti að hann myndi láta af störfum í lok tímabilsins.