Ætla ekki að undirrita fyrr en refsiaðgerðum verður aflétt

Íranar ætla ekki að samþykkja endanlegan kjarnorkusamning við stórveldin sex nema öllum refsiaðgerðum verði aflétt samdægurs. Hassan Roughani, forseti Írans, sagði í sjónvarpávarpi sínu í dag að Íranar geti ekki sætt sig við gildandi samning, slíkur samningur yrði að vera öllum aðilum í hag. Bandaríkjamenn hafa þó áður sagt að þeir muni ekki samþykkja slík skilyrði.

Nýundirritaður samningur var til bráðabirgða en hann felur meðal annars í sér að Íranar dragi verulega úr kjarnorkuáætlun sinni og takmarki auðgun úrans og annarra geislavirkra efna sem mögulega væri hægt að nota í kjarnorkuvopn. Í staðinn verður dregið verulega úr alþjóðlegum viðskiptaþvingunum og bönnum gegn Íran sem leikið hafa efnahag landsins grátt árum saman.

Frestur til að ná endanlegu samkomulagi rennur út 30. júní. Íranar, Bandaríkjamenn, Þjóðverjar, Frakkar, Bretar, Rússar og Kínverjar munu því setjast við samningaborðið á næstu dögum til frekari viðræðna.