Defoe vill fara á HM með Englandi

„Ég var ekki að leitast eftir því að fara frá Tottenham,“ segir Jermaine Defoe í ítarlegu viðtali við Sky Sports en framherjinn öflugi yfirgaf London og hélt til Toronto.

Hann hefur brátt leik með Toronto FC í bandarísku MLS-deildinni. Það var aldrei á dagskránni hjá honum að fara en tækifærum hans hjá Tottenham fór fækkandi.

„Á endanum varð það þannig að ég fékk ekkert að spila nema Evrópuleiki þar sem ég fann mig virkilega vel og var að skora mörk. Ég vonaðist til að fá fleiri tækifæri en þau komu ekki. Ég get ekki útskýrt það frekar,“ segir Defoe.

England verður á meðal þeirra 32 þjóða sem taka þátt á HM í Brasilíu í sumar og þangað langar Defoe að fara. Hann segir það ekki skemma fyrir sér að hann spili í MLS-deildinni.

„HM var það fyrsta sem ég hugsaði um þegar ég ákvað að fara til Toronto. Allir sem hafa spilað á HM vita að það er engu líkt,“ segir Defoe.

„Ef ég er að spila og er í formi er ég á þeim stað á ferlinum að þjálfarinn veit alveg hvað ég get. Þetta snýst bara um að ég sé ánægður og að skora mörk,“ segir Jermain Defoe.