Welbeck: Hugsaði minn gang í heilt ár

Danny Welbeck segir að hann hafi verið farinn að íhuga framtíð sína hjá Manchester United löngu áður en hann fór til Arsenal.

Welbeck var seldur til Arsenal á lokadegi félagskiptagluggans í sumar fyrir 20 milljónir punda. Louis van Gaal, stjóri United, fannst hann ekki passa í sínar áætlanir en Welbeck segist hafa verið byrjaður að hugsa sinn gang löngu áður en Hollendingurinn kom til félagsins.

„Þegar maður er að hefja nýjan kafla á ferli sínum eftir að hafa verið lengi á sama staðnum verður maður að hugsa málin vandlega,“ sagði Welbeck við Manchester Evening News.

„Ég var því byrjaður að hugsa um hvað væri best fyrir mig í eitt ár eða svo. Ég var mikið að spila á vinstri kantinum í 4-4-2 kerfinu og fannst það erfitt því ég gat lítil áhrif haft á leikinn,“ sagði hann.

„Ég lagði mig allan fram en þetta var ekki besti kosturinn fyrir liðið þar sem ég gat haft meiri áhrif í minni bestu stöðu.“

„Þá byrjaður maður að hugsa sig um, þó svo að ég hafi alltaf lagt mig 100 prósent fram á æfingum og leikjum. Það breyttist aldrei. En maður byrjar þá að skoða málin út frá því hvað sé best fyrir mann sjálfan.“