Herrera þarf að mæta fyrir rétt vegna hagræðingu úrslita

Ander Herrera, miðjumaður Manchester United, þarf að ferðast heim til Spánar á næsta ári og mæta fyrir rétt þar sem hann verður yfirheyrður vegna gruns um þátttöku í hagræðinu úrslita.

Herrera er einn af 28 leikmönnum sem þarf að mæta fyrir réttinn í Valencia, en hann spilaði leik með uppeldisfélagi sínu Real Zaragoza árið 2011 sem verið er að skoða.

Javier Aguirra, fyrrverandi þjálfari Zaragoza sem nú stýrir landsliði Japans, og Gabi, núverandi fyrirliði Spánarmeistara Atlético Madrid, eru á meðal þeirra sem verða yfirheyrðir.

Real Zaragoza þurfti að vinna síðasta leikinn í spænsku 1. deildinni tímabilið 2010/2011 til að halda sæti sínu í deildinni og gerði það með 2-1 sigri á Levante í lokaumferðinni.

Herrera var þá á leiðinni til Athletic Bilbao og gekk í raðir baskaliðsins skömmu eftir að tímabilinu lauk.

Grunur lá um að leiknum yrði hagrætt áður en hann fór fram, en Agusto Lendoiro, forseti Deportivo La Coruna sem á endanum fór niður í stað Zaragoza, gaf í skyn að forseti Zaragoza, Agapito Iglesias, ætlaði sér að hafa einhver áhrif á leikinn.

Gabi, sem þá var fyrirliði Real Zaragoza, viðureknndi í síðasta mánuði að ákveðin peningaupphæð hafi verið millifærð á bankareikning hans vikunni fyrir leikinn sem verið er að skoða. Hann sagðist hafa verið beðinn um að taka peninginn út og skila honum til forseta félagsins.

Ander Herrera er einnig talinn vera einn af sjö leikmönnum sem fengu álíka greiðslu ásamt þjálfaranum Javier Aguirre.

Iglesias forseti segir að peningurinn hafi verið bónus til leikmannanna, en Gabi segir að bónusar hafi aldrei verið greiddir út fyrir leiki. Hann hafi átt að skila peningnum til forsetans.

Zaragoza var við það að að fara í greiðslustöðvun á þessum tíma og sagði Gabi enn fremur að leikmennirnir hafi einfaldlega verið að gera það sem þeim var sagt.

Gabi var upphaflega yfirheyrður í október en þarf nú að fara líkt og Ander Herrera og fleiri til Valencia í byrjun næsta árs og vitna fyrir rétti.