Treyjurnar hans James seldust frekar ódýrt

Íslandsvinurinn David James neyddist til þess að selja marga af sínum verðmætustu munum eftir að hann varð gjaldþrota.

James er talinn hafa þénað tæpa fjóra milljarða króna á ferlinum en honum tókst að eyða öllu fénu.

Sölunni á mununum er nú lokið og náðist að safna frekar litlum pening upp í þrotabúið. HM-treyja frá 2002, er England lagði Argentínu, fór á 130 þúsund krónur.

Liverpool-treyja frá árinu 1995 seldist á 30 þúsund krónur á meðan Portsmouth-treyja frá 2008 fór á 92 þúsund krónur. Þetta þykja ekki háar tölur miðað hvað gengur og gerist á íslenskum Herrakvöldum.

James er nú spilandi þjálfari hjá Kerala Blasters FC í indverska boltanum. Hann spilaði 53 landsleiki á sínum tíma.