Tvö sjálfsmörk urðu Everton að falli

Það er óhætt að segja að leikmenn Everton hafi verið gjafmildir þegar þeir sóttu Southampton heim á St. Mary's völlinn í dag.

Southampton komst yfir strax á fyrstu mínútu þegar Antolin Alcaraz - sem lék í vörn Everton í fjarveru Frakkans Sylvain Distin - skallaði boltann í eigið net eftir fyrirgjöf frá Rickie Lambert.

Seamus Coleman endurtók svo leik Alcaraz þegar hann skallaði fyrirgjöf Nathaniel Clyne framhjá Tim Howard á 31. mínútu. Bæði sjálfsmörkin voru afar klaufaleg, en þau má sjá í spilaranum hér að ofan.

Lambert komst svo nálægt því að bæta þriðja marki heimamanna við í seinni hálfleik þegar skot hans beint úr aukaspyrnu small í stönginni. Fleiri urðu mörkin hins vegar ekki og Southampton fagnaði þar með sínum fyrsta sigri í fjórum leikjum. Dýrlingarnir sitja þó eftir sem áður í 8. sæti

 

Tapið setti stórt strik í reikning Everton í baráttunni um fjórða sætið sem gefur þátttökurétt í Meistaradeild Evrópu. Liðið er nú einu stigi á eftir Arsenal, en Skytturnar geta farið langt með að tryggja sér fjórða sætið með sigri á Newcastle United á mánudagskvöldið.