Held að Bruce hafi fengið sér bjór strax eftir leik

Roy Keane var fljótur að þagga niður í fyrrum félaga sínum hjá Man. Utd, Steve Bruce, eftir að sá síðarnefndi vildi fá Curtis Davies í enska landsliðið.

Davies var ein af hetjum Hull um helgina er liðið tryggði sér sæti í undanúrslitum ensku bikarkeppninnar.

"Hann er búinn að vera frábær í allan vetur. Traustur varnarmaður sem skorar reglulega. Hann gæti verið í landsliðinu rétt eins og fleiri," sagði Bruce sem er stjóri Hull.

Keane fannst þessi ummæli Bruce fyndin.

"Allt tal um að velja eigi Davies í landsliðið er bilun. Ég held að Bruce hafi skellt í sig einum bjór strax eftir leik," sagði Keane léttur en hann starfar se sjónvarpsmaður hjá ITV.

"Hann er ekki í þeim gæðaflokki en góður leikmaður engu að síður."