Messan: Gylfi tók bara yfir leikinn á móti Newcastle | Myndband

Guðmundur Benediktsson og sérfræðingar hans í Messunni, Bjarni Guðjónsson og Ríkharður Daðason, fóru yfir frammistöðu íslenska landsliðsmannsins Gylfa Þórs Sigurðssonar í leik Swansea og Newcastle í ensku úrvalsdeildinni um helgina.

„Gylfi er greinilega alltaf að horfa á Messuna því við báðum hann aðeins um að lyfta leiknum eftir síðustu helgi og hvað gerir hann. Hann bara tekur yfir þennan leik á móti Newcastle," sagði Guðmundur Benediktsson og beindi orðum sínum til Bjarna Guðjónssonar.

„Já hann var frábær. Gylfi er frábær í því að finna svæði á milli línanna alveg eins og David Silva. Svo er hann líka með einstakt auga fyrir spili eins og við sáum skipti eftir skipti í leiknum. Það nánast klikkar ekki sending hjá honum, hann leggur upp bæði mörkin og var allstaðar að finna pláss," sagði Bjarni.

Það má sjá umfjöllun Messu-manna um frammistöðu Gylfa með því að smella hér fyrir ofan. Gylfi átti stórleik á móti Newcastle og lagði upp fullt af færum fyrir félaga sína.

„Þetta kemur á hárréttum tíma fyrir okkur því nú er hann að koma inn í landsleikjahléið. Gylfi tók smá dívu og hvíldi sig aðeins en náði sér síðan aftur í gott leikform og verður frábær í næstu tveimur leikjum," sagði Bjarni en það má sjá alla umfjöllunina hér fyrir ofan.