Stones hjá Everton til ársins 2019

Varnarmaðurinn John Stones hefur skrifað undir nýjan fimm ára samning við Everton. Stones fylgir þar með í fótspor Ross Barkley og Seamus Coleman sem skrifuðu báðir undir langtíma samninga við Everton fyrr í sumar.

Stones, sem er tvítugur, lék 26 leiki með Everton á síðustu leiktíð, en hann kom inn í byrjunarlið liðsins undir lok leiktíðarinnar eftir að fyrirliðinn Phil Jagielka meiddist.

Stones kom til Everton frá Barnsley í janúar 2013, en talið er að Everton hafi borgað í kringum þrjár milljónir punda fyrir hann.

Hann lék sína fyrstu landsleiki fyrir England í vor.