Fellaini ekki refsað vegna hrákumálsins

Enska knattspyrnusambandið tilkynnti í kvöld að það myndi ekki aðhafast vegna „hrákumálsins" svokallaða úr leik Manchester-liðanna.

Sumir töldu að Marouane Fellaini, leikmaður Man. Utd, hefði hrækt á Sergio Aguero, leikmann Man. City.

Belginn var reiður út í Argentínumanninn í leiknum og öskraði á hann þar sem hann taldi Aguero vera að reyna að fiska víti.

Myndir sýndu munnvatn leka af vörum Fellaini en ekki var hægt að sjá að hann hefði beinlínis hrækt á Aguero. Hann hefði allt eins getað verið að slefa af bræði.

Sjálfur neitaði Fellaini öllum sögusögnum um hrákur og sagði fjölmiðlamenn vera að búa til sögu.