183 dæmdir til dauða í Egyptalandi

Dómstóll í Egyptalandi staðfesti í dag dauðadóm yfir 183 liðsmönnum Bræðralags múslima. Þeim er gert að sök að hafa gert árás á lögreglustöð í Minya héraði árið 2013.

BBC greinir frá. Upphaflega var réttað yfir 683 og hafði dómari í málinu úrskurðað að taka ætti þá alla af lífi. Réttarhöldin voru harðlega gagnrýnd og hafa refsingarnar verið mildaðar í mörgum tilfellum. 496 þeirra sem upphaflega voru dæmdir hafa nú verið sýknaðir. Mohamed Badie, æðsti trúarleiðsögumaður Bræðralags múslima, er hins vegar meðal þeirra sem fengu dauðadóm sinn staðfestan í dag.

Lögmenn sakborningana sögðu þessi réttarhöld „farsa“ og líklegt þykir að málinu verði áfrýjað til hæstaréttar.

Yfirvöld í Egyptalandi hafa tekið hart á íslamistum í landinu frá því að Mohammed Morsi , fyrrum forseta, var steypt af stóli í júlí 2013. Morsi er félagi í Bræðralagi múslima sem var við völd í landinu fyrir byltingu en hefur nú verið bannað af nýjum yfirvöldum og  úrskurðað hryðjuverkasamtök.

Talið er að ný ríkisstjórn Egyptalands, sem herinn kom til valda, hafi nú dæmt um þúsund pólítíska andstæðinga sína síðan í desember.