Egypskir dauðadómar vekja hörð viðbrögð

Verjendur nærri sjö hundruð sakborninga létu ekki sjá sig í gær í dómssal í bænum Minja, skammt suður af Kaíró, þegar kveða átti upp dóm eftir harla hraðsoðin réttarhöld.

Dómarinn, Saíd Jússef Elgazar, brást við með því að fresta dómsuppkvaðningu til 28. apríl, en sagði jafnframt að réttarhöldunum yrði hraðað eftir megni.

Á mánudaginn dæmdi sami dómari 529 manns á einu bretti til dauða, eftir álíka hraðsoðin réttarhöld þar sem verjendum var meinað að tala máli skjólstæðinga sinna.

„Ég hef aldrei séð annað eins á allri minni tíð sem lögfræðingur,“ hefur breska dagblaðið The Guardian eftir Adel Aly, einum af lögmönnum sakborninganna.

Réttarhöldin hafa vakið hörð viðbrögð, jafnt innanlands sem erlendis. Mannréttindasamtök á borð við Amnesty International hafa fordæmt réttarhöldin og segja dauðadómana vera „fáránlegt dæmi um annmarka á egypsku réttarfari og óhlutdrægni þess“. Bandarísk stjórnvöld segjast hafa miklar áhyggjur af dauðadómunum og Carl Bildt, utanríkisráðherra Svíþjóðar, segir á Twitter-síðu sinni réttarhöldin afkáraleg: „Meira en 500 manns dæmdir til dauða eftir eitt einasta dómþing í Egyptalandi. Það versta sem sést hefur á heimsvísu.“

Sakborningarnir eru flestir liðsmenn eða stuðningsmenn Bræðralags múslima og tóku þátt í mótmælum til stuðnings Mohammed Morsi, sem egypski herinn steypti af stóli forseta í júlí á síðasta ári.

Nýja stjórnin, sem tók við völdum eftir að Morsi hafði verið bolað burt, hefur gengið hart fram gegn stuðningsmönnum Morsis. Um 16 þúsund manns hafa verið handteknir síðan síðasta sumar. Dómarinn Elgazar er sagður hafa áður kveðið upp umdeilda dóma. Þar á meðal er nefndur til dómsúrskurður hans frá í janúar í fyrra, þegar hann sýknaði lögreglumenn sem sakaðir voru um að hafa myrt mótmælendur í byltingunni gegn Hosni Mubarak árið 2011.