Morsí sakaður um tengsl við systursamtök Bræðralagsins

Ákæruskjal á hendur Múhamed Morsí hefur verið birt, en hann hefur verið í haldi egypska hersins frá því honum var steypt af stóli þann 3. júlí.

Í skjalinu kemur í fyrsta sinn fram hin opinbera skýring hersins á því að honum er haldið föngnum. Þar er hann sakaður um tengsl við palestínsku Hamas-samtökin, sem eru systursamtök Bræðralags múslima, hinna egypsku samtaka sem Morsi sjálfur tilheyrir.

Í ákærunni er Morsi gefið að sök að hafa flúið úr fangelsi með hjálp Hamas árið 2011, þegar uppreisnin gegn Hosni Mubarak forseta var í hámarki.

Það er AP fréttastofan sem greinir frá þessu og vitnar í egypsku ríkisfréttastofuna MENA.

Birting skjalsins ber upp á sama dag og boðað hefur verið til fjöldamótmæla í Kaíró, bæði af hálfu Bræðralags múslima og af hálfu hersins.

Abdel Fatta al Sísí, yfirmaður egypska hersins, hvatti í vikunni fólk til að fjölmenna út á götur í dag til að sýna bæði hernum og bráðabirgðastjórn landsins stuðning. Herinn og stjórnin þurfi skýrt „umboð“ til að „gera það sem þarf“ til að kveða niður ofbeldismenn, sem herinn segir að hafi átt upptökin að mannskæðum átökum í Kaíró undanfarið.

Stuðningsmenn Morsis saka herinn um mannrán og krefjast þess að Morsí fái forsetaembættið aftur.

Í egypskum fjölmiðlum hefur mikið verið fjallað um flótta Morsís úr fangelsi. Bræðralag múslima hefur haldið því fram að það hafi verið heimamenn, sem hjálpuðu honum að flýja, en ýmsar sögur hafa gengið um að Hamas-samtökin í Palestínu og Hezbollah-samtökin í Líbanon hafi skipulagt flóttann.