Lampard gæti spilað í Bandaríkjunum

Frank Lampard, landsliðsmaður Englands í fótbolta, íhugar nú að spila í MLS-deildinni í Bandaríkjunum en hann staðfesti brottför sína frá Chelsea á mánudaginn.

Lampard lék með Chelsea í 13 ár og er leikmaður sem nýja liðið New York City FC vill fá í sínar raðir. Það er nú þegar búið að klófesta spænska framherjann David Villa.

"Bandaríkin eru möguleiki. Ég er að skoða ýmsa möguleika en ég vill allavega halda áfram að spila," segir Lampard sem spilar sinn 104. landsleik í dag.

Lampard býst við því að hætta að spila með enska landsliðinu eftir HM en vill nú algjörlega einbeita sér að heimsmeistarakeppninni.

"Ég væri til í að finna mér nýtt lið en það tekst ekki fyrir HM. Það er held ég ekki hægt núna. Ég er nógu stór strákur til að einbeita mér bara að HM núna með Englandi," segir Frank Lampard.