Özil ekki sami leikmaðurinn eftir að hann fór til Arsenal

Michael Ballack, fyrrverandi fyrirliði þýska landsliðsins í fótbolta, hefur miklar áhyggjur af MesutÖzil, leikmanni Arsenal, fyrir HM í Brasilíu og segir hann ekki vera sama manninn eftir að hann gekk í raðir enska félagins.

"Það er erfitt að segja til um hvernig hann mun mæta til leiks á HM," segir Ballack sem spilaði fyrir Þýskaland á HM 2002 og á heimavelli árið 2006.

"Ég sá hann spila fyrir landsliðið um helgina og það sem ég sá kom mér ekki á óvart og ég var ekki hræddur en frammistaða hans olli mér áhyggjum."

Özil átti frábæra tíma hjá Real Madrid en var svo keyptur til Arsenal fyrir 42,5 milljónir punda síðasta sumar. Ballack finnst Özil ekki vera að spila eins og hann best getur á Englandi.

"Hann hefur staðið sig vel fyrir Þýskaland í gegnum tíðina og var góður í undakeppninni. En á síðustu mánuðum, eftir að hann fór til Arsenal, hefur hann ekki verið sami leikmaðurinn. Hann skortir sjálfstraustið sem við sáum alltaf í landsleikjunum," segir Ballack.

"Ég veit ekki hvort vistaskiptin til Arsenal höfðu svona mikil áhrif á hann en hann var allavega ósnertanlegur á tímabili og við Þjóðverjar lítum enn á hann sem einn af okkar bestu leikmönnum."

"Hann er samt enginn leiðtogi á vellinum. Hann er frábær leikmaður og þarf að taka meiri ábyrgð sem einn af okkar bestu leikmönnum. Við búumst einfaldlega við meiru frá honum," segir Michael Ballack.