Diego Costa búinn að standast læknisskoðun?

Samkvæmt vef BBC er Diego Costa, leikmaður Atletico Madrid, búinn að standast læknisskoðun hjá Chelsea. Eru því aðeins formsatriði eftir til þess að félagsskiptin geti gengið í gegn.

Talið er að Chelsea greiði 32 milljónir punda fyrir Costa og er næst á dagskránni að semja við Costa um persónuleg kjör. Takist það á næstu dögum er ekkert þess til fyrirstöðu að Costa skrifi undir hjá Chelsea áður en Heimsmeistaramótið hefst.

Costa átti frábært tímabil í liði Atletico sem vann spænsku deildina í fyrsta sinn síðan 1996 ásamt því að liðið komst í úrslitaleik Meistaradeildarinnar. Costa fór á kostum í liði Atletico en hann setti 36 mörk á tímabilinu í 52 leikjum.

Hinn brasilíski Costa vakti athygli þegar hann valdi að spila fyrir spænska landsliðið. Vicente Del Bosque, spænski landsliðsþjálfarinn, valdi hann í lokahóp Spánverja fyrir mótið þrátt fyrir að Costa hafi glímt við meiðsli undanfarnar vikur.