Liverpool hefur ekki fengið á sig fleiri mörk í tuttugu ár

Liverpool fór langt með að klúðra möguleikanum á því að enda 24 ára bið eftir Englandsmeistaratitlinum í gærkvöldi þegar liðið missti niður 3-0 forystu á Selhurst Park.

Liverpool-liðið hefur raðað inn mörkum á þessu tímabili og verið hreinlega með það markmið að skora bara meira en mótherjarnir. Það hlaut samt að koma að því að skelfilegur varnarleikur yrði liðinu að falli og það gerðist á móti Crystal Palace í gær.  Myndband frá leiknum er aðgengilegt hér fyrir ofan.

Liverpool hefur alls fengið á sig 49 mörk í 37 deildarleikjum á tímabilinu og er aðeins í áttunda sæti yfir besta varnarlið ensku úrvalsdeildarinnar.

Það þarf líka að fara allt til tímabilsins 1993-94 eða í heil tuttugu ár aftur í tímann til að finna tímabil þar sem Liverpool hefur fengið á sig fleiri mörk.

Liverpool-liðið fékk á sig 55 mörk í 42 leikjum tímabilið 1993-94 en liðið endaði þá aðeins í áttunda sæti deildarinnar. Liverpool er í raun að fá á sig fleiri mörk í leik á þessari leiktíð (1,32) heldur en á þessu matraðartímabili fyrir tuttugu árum (1,31)

Liverpool fékk reyndar á sig 49 mörk tímabilið 1998-98 en á enn einn leik eftir á leiktíðinni og því hætt við því að fleiri sleppi inn í honum.

Flest mörk fengið á sig hjá Liverpool á einu tímabili undanfarin 20 ár:

55 mörk - 1993-94 (8. sæti)

49 mörk - 2013-14 (Er í 1. sæti)

49 mörk - 1998-99 (7. sæti)

44 mörk - 2010-11 (6. sæti)

43 mörk - 2012-13 (7. sæti)

42 mörk - 1997-98 (3. sæti)