Mangala hefur allt til að verða einn af þeim bestu

Englandsmeistarar Manchester City hafa gengið frá kaupunum á varnarmanninum Eliaquim Mangala frá FC Porto en City-menn borga 32 milljónir punda fyrir hann eða 6,2 milljarða íslenskra króna.

Eliaquim Mangala er 23 ára gamall miðvörður sem getur einnig spilað sem vinstri bakvörður. Hann var í HM-hópi Frakka á Heimsmeistaramótinu í Frakklandi í sumar.  

Manchester City tapaði 0-3 fyrir Arsenal í leiknum um Samfélagsskjöldinn í gær og þar varð auðséð að liðið mætti styrkja sig í miðri vörinni.

„Hann er þegar orðinn mjög góður leikmaður. Hann hefur allt, það andlega, það líkamlega, tæknina og leikskilninginn, til þess að verða einn af bestu varnarmönnum Evrópu," sagði Manuel Pellegrini, knattspyrnustjóri Man. City vð BBC. Mangala er sjötti leikmaðurinn sem City kaupir í sumar.

Eliaquim Mangala lék með Porto frá 2011 til 2014 en áður var hann í herbúðum belgíska félagsins Standard Liège.

Mangala verður í treyju númer 20 hjá Manchester City. „City er toppklúbbur í Evrópu. Það var mikilvægt fyrir mig að fara frá Porto og komast til Manchester City til þess að geta þróað minn leik enn frekar. Ég vil vinna titla og ég trúi því að ég geti það hjá City. Ég hef mikinn metnað og þessa vegna er ég hér," sagði Eliaquim Mangala við BBC.