Sinclair ætlar ekki að sitja á bekknum

Enski kantmaðurinn Scott Sinclair útilokar ekki að hann verði áfram hjá Manchester City í vetur fái hann einhver tækifæri hjá liðinu. Sinclair sem gekk til liðs við City árið 2012 hefur aðeins þrisvar fengið tækifærið í byrjunarliði Manchester City.

Það kom töluvert á óvart þegar þáverandi knattspyrnustjóri Manchester City, Roberto Mancini, gekk frá kaupunum á Sinclair árið 2012. Hann hafði þá slegið í gegn í liði Swansea árið áður.

Sinclair eyddi síðasta tímabili á láni hjá West Bromwich Albion en hann hefur hinsvegar fengið nokkur tækifæri með Manchester City á undirbúningstímabilinu í ár. Hann útilokar ekki að berjast um sæti í gríðarlega sterku liði City.

„Ég vill bara spila eins marga leiki og hægt er og ég veit ekki hvað framtíðin ber í skauti sér. Ég reyni að taka bara einn leik fyrir í einu, ég hef spilað töluvert á undirbúningstímabilinu og vonandi heldur það áfram. Vonandi fæ ég einhver tækifæri í vetur því annars þarf ég að leita eitthvert annað,“ sagði Sinclair.