Gætu orðið árekstrar á milli Rooney og Van Gaal

Samkvæmt enskum fjölmiðlum þá mun Louis van Gaal skrifa undir samning við Man. Utd í næstu viku um að gerast knattspyrnustjóri félagsins.

Margir hafa efasemdir um þessa ráðningu og Mehmet Scholl, sem vann með Van Gaal hjá Bayern, segir að það gætu orðið árekstrar.

"Hann er mjög strangur og ákveðinn. Ef menn hlýða honum ekki þá eru þeir sendir burt og nýir menn teknir inn," sagði Scholl sem var varaþjálfari hjá Bayern er Van Gaal þjálfaði þar.

"Mér skilst að alls staðar þar sem hann hafi þjálfað þá hafi hann lent í vandræðum með stjörnur liðsins sem og með aðstoðarmenn sína."

Þó svo Van Gaal eigi í vandræðum með mannleg samskipti þá á hann sínar góðu hliðar líka að mati Scholl.

"Hann er ekki góður í að hvetja menn til dáða en er frábær á æfingasvæðinu. Þannig læra leikmenn," segir Scholl en munu stjörnur United lenda í vandræðum með Hollendinginn?

"Sumir leikmenn eins og Rooney þurfa ekki að læra meira. Hann á því eftir að lenda í vandræðum ef þjálfarinn segir að hann verði að gera einhverja hluti á allt annan hátt en hann hefur verið að gera. Ég held aftur á móti að Van Persie verði í betri málum þar sem hann er Hollendingur. Van Gaal er frábær í að vinna með yngri leikmönnum en þeir eldri gætu lent í vandræðum."