Rodgers svarar Carragher: Karakterinn í liðinu er óumdeildur

Liverpool heimsækir búlgarska liðið Ludogorets í Meistaradeildinni í kvöld og í gær sat Brendan Rodgers, knattspyrnustjóri liðsins, fyrir svörum á blaðamannafundi.

Þar var hann spurður út í orð Jamie Carraghers, fyrrverandi miðvarðar Liverpool, sem nú starfar sem sérfræðingur Sky Sports.

Carragher hafði fátt fallegt að segja um sína gömlu félaga eftir 3-1 tap gegn Crystal Palace á sunnudaginn. Hann sagði liðið skorta alla karlmennsku og karakter.

„Við heyrum gagnrýnina en það er karakter í þessu liði. Það sýndum við á síðustu leiktíð. Vissulega fáum við fleiri mörk á okkur en við viljum, en það er ekki hægt að efast um karakterinn í þessu liði. Hann er óumdeildur,“ sagði Rodgers um gagnrýnina.

„Við erum með leikmenn sem sýna mikinn vilja, en þegar liðið er ekki að vinna hefur það áhrif á sjálfstraustið og þá spilar maður ekki jafn vel. Mitt starf er að blása sjálfstrausti í liðið.“

Carragher sagði eftir leikinn á sunnudaginn að Palace-liðið hefði látið kúga sig inn á vellinum og einfaldlega verið undir í baráttunni.

„Þetta er eitthvað sem var sagt. Þetta gerist þegar menn fá borgað fyrir að gagnrýna. Kannski ekki gagnrýna, en allavega meta liðið. Þegar maður tapar leikjum hef ég tekið eftir því að menn segja það sem þeir vilja og þá gerist þetta,“ sagði Rodgers.

„Hvort sem maður á gagnrýnina skilið eða ekki verður maður bara að hunsa hana. Ég er með fullt lið af karakterum, leikmönnum sem vilja gera vel og vonandi bætir það liðið. Við verðum bara að sýna að við getum náð góðum úrslitum og það er það sem við munum gera.“